أشهر 5 خروجات في المعادي بأسعار تبدأ من 10 جنيه

عايز تخرج في المعادي مع صحابك بس مش عارف تخرجوا فين ولا تعملوا ايه؟ بسيطة!  هنقولك على 5 أنشطة مختلفة و مسلية ممكن تعملها لو انت و شلتك في المعادي و هنعرفك كمان كل الأسعار اللي ممكن تحتاجها

أشهر الخروجات في المعادي و أسعارها

البولينج

لازم نبدأ باللعبة الكلاسيك اللي كلنا بنحبها من زمان، البولينج موجود في بندر في شارع فلسطين بالتحديد جنب شارع النصر في المعادي.

صالة البولينج عبارة عن 5 lanes ممكن تاخد صحابك و لوعددكم مش كفاية في lane  واحد ممكن تحجزوا 2 lanes جنب بعض و سعر ال Lane75 جنيه و الجيم بتكون 10 راوندات.

 دا غير ان بندر صالة ألعاب متميزة مش بس مقتصرة على البولينج كمان في Arcade Games زي ال Air Hockey و بيبي فووت و ألعاب تانية كتير سعرها موحد و هو 15 جنيه.

 الصالة متميزة بأضوائها الهادية و المريحة و المناسبة جدا للتصوير

البادل

البادل رياضة انتشرت بشكل كبير مؤخرا و المميز فيها انها مش لسن معين هي رياضة مناسبة لكل الاعمار المختلفة.

و لو مجربتش البادل قبل كدا ممكن تاخد عيلتك او صحابك و تطلعوا على Club 7  في المعادي عند ميدان فيكتوريا.

حجز الملعب بيكون ل 4 افراد و الساعة ب360 جنيه و بتاخدوا 5 كور و أربع مضارب.

 تقدر تحجز الملعب من هنا او عن طريق ابليكيشن بتنزله على الموبايل من هنا  

التزلج على الجليد

من امتع الحاجات الممكن تعملها مع صحابك في المعادي انكوا تطلعوا علي Family Land  عند أبراج عثمان ناحية كورنيش المعادي و تجربوا التزلج، سعر النص ساعة 70 جنيه. 

والسعر شامل ال Roller Blades  و المميز في Family Land  ان فيها واحدة من أفضل السينمات في المعادي و هي سينما جالاكسي و سعر الحفلات فيها موحد في كل الأوقات و هو 110 جنيه للتيكيت.

محمية وادي دجلة

لو انت نفسك تفصل و تبعدوا عن الزحمة و الدوشة في المدينة ممكن تاخد صحابك و تجهزوا عدة الشوي او تاخدوا معاكم اكل و Board Games  و تطلعوا على محمية وادي دجلة.

 تذكرة الدخول هتكلفكم 10 جنيه للفرد.

 ممكن تحتاجوا عربية علشان يكون الدخول للمحمية سهل

 او ممكن تركنوا العربية في مكان امن و قريب و المكان الأنسب لركنة قريبة هيكون المسجد الكويتي في زهراء المعادي و تتمشوا من هناك للبوابة.

سكوترز Rabbit

المعادي معروفة بجمال شوارعها الواسعة المليانة بالشجر من كل الجوانب،وانت بتتمشى هتلاقي سكوترز في اكتر من مكان في المعادي من اول دجلة لميدان فيكتوريا،

 هتحتاج ان يكون عندك ابليكيشن Rabbit على الموبايل علشان تعرف تأجر السكوتر،علشان تفتح السكوتر بتدفع الأول 3 جنيه و بعد كدا سعر الدقيقة بيكون جنيه.

و من افضل الأماكن اللي ممكن تأجر فيها سكوتر هي دجلة لانها بتتميز بشوارعها الجميلة و الهادية اللي هتخلي التجربة من امتع التجارب اللي ممكن تعملها في المعادي.
 

و ممكن كمان تعرف أكتر مين أوفر عجلة كايرو بايك ولا اسكوتر رابيتRabbit؟