مركز المساعدة الخاص بالمنتجات

اهلا بيك فى مركز المساعدة

Question

ما هي قروض السيارات، وتكليفتها؟

يعني ايه قرض سيارة؟

قرض السيارة هو نوع من القروض اللي بيقدمها البنوك للأفراد وبيكون القرض بضمان السيارة اللي ناوي تشتريها، وتتراوح مدة قروض السيارات من سنة لـ 7 سنين

ايه الفرق بين قرض السيارة، القرض الشخصي وقرض المنزل؟

الفرق هو ان القرض الشخصي مش بيكون بضمان أصول (الضمان الوحيد هو المرتب)، وقرض المنزل بيكون بضمان المنزل اللي اشتريته ومدة القرض بتوصل لـ20 سنة، أما قرض السيارة فـ بيكون بضمان السيارة وماينفعش تبيع السيارة أو تجدد رخصتها من غير موافقة البنك. 

ايه المطلوب عشان تقدم على قرض سيارة؟

في أربع برامج رئيسية للتقديم على قرض السيارة: 1-للموظفين 2- لأصحاب الأعمال المهنية 3- لأصحاب الأعمال الحرة 4- بدون اثبات دخل(برامج البطاقة الشخصية)

بس الأول لازم يكون عندك:

  • ملف ائتماني إيجابي (i-score)
  • حد الاقتراض الشخصي متوازن، بمعنى ان القرض اللي عايز تاخده زائد باقي التزاماتك البنكية لازم مايعديش 50% من صافي دخلك.

ايه هي الاوراق المطلوبة للتقديم؟

الأوراق المطلوبة للتقديم على قرض سيارة بتعتمد على نوع وظيفتك والبنك اللي هيديك القرض، ودول الأوراق اللي بتكون دايما مطلوبة في كل البنوك:

  • عام (للكل)
    • بطاقة الرقم القومي أو جواز سفر
    • إثبات للعنوان (إيصال مرافق)
  • للموظفين:
    • خطاب مفردات مرتب من الشركة (موضح به تاريخ التوظيف,صافى الراتب,المنصب الحالى)
    • كشف حساب بنكي مختوم عن الفترة من 3 لـ12 شهر (بتعتمد على البنك اللي بيقدم القرض)
  • لأصحاب الأعمال المهنية:
    • كشف حساب بنكي مختوم عن الفترة من 3 لـ12 شهر (بتعتمد على البنك اللي بيقدم القرض)
    • كارنيه نقابه
    • شهاده مزاوله المهنه ( اذا توفر)
    • بطاقة ضريبية
  • لأصحاب الأعمال الحرة:
    • كشف حساب بنكي مختوم عن الفترة من 3 لـ12 شهر (بتعتمد على البنك اللي بيقدم القرض)
    • سجل تجارى
    • بطاقة ضريبية
  • اوراق السياره:
    • للسيارات الجديدة:
      • عرض سعر من المعرض
    • للسيارات المستعمله:
      • شهادة من توكيل معتمد بحالة السيارة وسعر السوق.
      • صورة من تسجيل السيارة.

تكاليف قرض السيارة:

فى خمس حاجات لازم تعمل حسابهم و انت بتحسب تكاليف قرض السيارة:

  1. سعر الفايدة: لو عايز تعرف اكتر عن سعر الفايدة راجع قسم الفايدة فى مركز المساعدة ، معدل الفايدة هو العامل الرئيسى لما تيجى تاخد قرض سيارة و هو ده المبلغ اللى هتتحاسب عليه طول مدة القرض ، معدلات الفايدة ليها شكلين بس هما الاتنين بيمثلوا نفس الحاجة:

الفايدة المتناقصة: في المعدل ده الفايدة بتتحسب بس على المبلغ المتبقي من القرض خلال اى فترة زمنية.

الفايدة الثابتة: المعدل ده بيمثل شكل تانى من الفايدة، والفايدة هنا بتتحسب على مبلغ القرض بالكامل.

خليك فاكر ان الفايدة المتناقصة و الفايدة الثابتة هما شكلين مختلفين لنفس الحاجة ومينفعش تقارنهم ببعض.

  1. المصاريف الادارية:  هى مصاريف ثابتة بتدفعها في بداية القرض مرة واحدة، و بتتخصم من القرض اللى انت مستلفه و بتكون فى حدود من 1% الى 4% و طبعاً بتختلف من بنك لبنك

خليك فاكر ان المصاريف الادارية بتتخصم من القرض اللى انت مستلفه كـ مصاريف مبدئية، يعنى لو اخدت قرض ب 100,000 جنيه والبنك حسب عليك 2 % مصاريف إدارية، البنك هيحولك 98,000 جنيه بس فى حسابك، بس القسط هيكون على اساس انك 

واخد 100,000 جنيه.

  1. رسوم ضريبية: البنك المركزى المصرى بيحسب عليك 0.05% لكل ربع سنة على المبلغ المتبقي من القرض (المديونية اللى عليك) ، وده رقم ثابت بين كل البنوك.
  2. تأمين على السيارة: كل البنوك بتطلب ان السيارة تكون متأمن عليها ضد الحوادث، السرقه أو الضرر بشكل عام، وتكاليف التأمين تتراوح بين 2% لـ 4% من قيمة السيارة فى السنة، وفى بعض البنوك بتسمحلك تختار شركة التأمين اللى انت عاوزها على عكس باقى البنوك اللى بيحددوا شركه معينه.
  3. المقدم: هي ما تعتبرش مصاريف عليك، هي النسبة من تمن السيارة اللي تقدر تدفعه كمقدم وده ممكن يأثر في:
  • عدد البنوك اللي ممكن تقبل القرض
  • اسعار الفايدة (وممكن تختلف في نفس البنك حسب المقدم اللي هتدفعه)
  • حالة السيارة

وتتراوح نسبة المقدم من 0%(بنوك قليلة جدا اللي ممكن تقبل ده) لغاية أي رقم تقدر تدفعه.

خليك متأكد انك عارف الفرق بين المقدم و سعر الفايدة عشان تقدر توصل لانسب قرض ليك.

مدة قرض السيارة قد ايه؟

مدة القرض بتبدأ من سنة وبتوصل لـ7 سنين وده المتاح في معظم البنوك، وفي بنوك ممكن يكون عندها مدد قصيرة جداً زي مثلا 6 شهور أو طويلة جدا زي 10 سنين، اتأكد الاول ايه البنك اللى عنده المدة المناسبة ليك.

هو انا اقدر اشترى اى عربية؟

ده كمان يعتمد على البنك، فى 3 حاجات مهمين خد بالك منهم :

  • جديده ولا مستعمله : معظم البنوك بتمول السيارات الجديده بس بعض البنوك بتمول السيارات المستعملة كمان، الخطوات و الأوراق و الاسعار بتختلف من واحد للتانى.
  • نوع السيارة: دي مشكلة في بعض البنوك انهم مابيقبلوش تمويل السيارات الصينيه بشكل خاص وانواع تانية كمان بيميلوا لتجنبها، وده بيعكس وجهة نظر البنوك على العمر الافتراضي للسيارة وقيمتها بعد البيع.
  • ملاكي ولا أجرة: ده كمان مشكله فى بعض البنوك انهم بيسمحوا بترخيص سيارات الأجرة على عكس باقي البنوك ( ده بس بالنسبة لتمويل السيارات الشخصية ومش للسيارات اللي تبع شركات).

ازاي اقدم على قرض سيارة؟  

حالياً ممكن تقدم على قرض سيارة من خلال انك تتصل بالبنك أو تزور أقرب فرع وموظف البنك هيعرفك الخطوات، عشان تعرف الخطوات الصح اتأكد انك شوفت كل التفاصيل والأوراق المطلوبة من هنا  (https://www.faydety.com/borrow/car-loan) عشان تكون مستعد قبل ما تروح الفرع.

قدّم اونلاين

قريب جداً هتقدر تقدم على قرض السيارة عن طريق فايدتي بسهولة من البيت، الشغل أو حتى الكافيه، لو انت مهتم بخدماتنا ممكن تدوس هنا  واحنا هنبعتلك كل التفاصيل أول ما يبقى التقديم متاح.

بلوج فايدتي

عايز تعرف عن عالم المال و ازاى بيأثر عليك؟ ادخل وافهم عن طريق المقالات بتاعتنا