أغلى وجبة عشاء فى العالم بـ 2 مليون دولار بس، تأكل؟!

بتفكر تغير جو أنت وحبيبتك أو مراتك أو حد من صحابك وعاوز تروح تتعشى برا مثلًا؟ حلو بس أكيد بيكون عندك ميزانية معينة فما بالك لو عرفت إن في عشاء مختلف سعره 2 مليون دولار! طبعًا أول أما تسمع حاجة زي كدا تفتكر إنها وليمة لمدينة كاملة وهيبقى كتير كمان بس الحقيقة إن فعلًا أغلى وجبة عشاء في العالم بتتقدم لفردين بس.

مين بيقدم الوجبة دي؟

مطعم "سي لا في" Ce La Vi  في سنغافورة، ودا مكانه على سطح فندق "مارينا باي ساندز"، ومدة الوجبة تستمر لمدة 8 ساعات.

مواصفات وجبة العشاء الفاخرة

البداية بتكون من خلال ركوب طيارة هليكوبتر لمدة 45 دقيقة في جولة فوق المدينة، وبعدها في رحلة بحرية على مركب فاخر، وبعدين رحلة خاصة بيتم فيها استخدام سيارة من نوع رولز رويس ودي اللي بتوصل الضيوف للمطعم نفسه.

تعاون مع شركة عالمية

المطعم السنغافوري بيتعامل في تقديم وجبة العشاء دي مع شركة "وورلد أوف دايموندس"، المتخصصة في صناعة الألماس في روسيا.

السفرة  بتتكون من 18 نوع أكل مختلف

السفرة بتتكون من ايه؟

العشاء بيتكون من 18 نوع مختلف على السفرة، مع 1000 وردة بتزين القاعة وترابيزة العشاء، وبيكون فيها قائمة الطعام اللي بتتقدم للشخصين، الكافيار والمحار، وكمان المطعم بيقدم زوجين من أعواد الأكل الصينية "هاشي"، والمميز إن العودين دول مرصعين بالألماس "عيار 4 قيراط"، وقيمتهما لوحدهم 17 ألف دولار.

الحلويات مع هدايا

المميز في وجبة العشاء المتكاملة والفاخرة دي إن بيتقدم الحلويات مع هدايا قيمة بتضم باقة زهور وخاتم ألماس أزرق "عيار 2.8 قيراط"، وزوجين من العيدان المرصعين بالألماس، اللي بيتحفر عليهم أسماء الشخصين.

معلومة ع الماشي: قعدة عشا غيرت التاريخ المالي

في قعدة عشا سنة 1950 كانت بتجمع بين رئيس شركة "Hamilton Credit Corporation" فرانك ماكنمارا وأصحابه اللي هما المحامي بتاعه وألفريد بلومنجديلز حفيد صاحب محلات Bloomingdales المعروفة وبعد ما خلصوا العشا وجه وقت دفع الحساب اتفاجئ "فرانك ماكنمارا" إنه مفيش معاه فلوس طبعًا كان موقف مُحرج جداً بالنسبة له وكلم مراته علشان تبعتله فلوس بس وهو قاعد فكر إزاي مايتحطش في الموقف المُحرج ده تاني فقال:

"إحنا ليه منعملش كارد زي اشتراك في مطاعم ومحلات مُعينة أي حد يكون معاه الكارد ده يدخل ويشتري اللي هو محتاجه من غير ما يدفع فلوس وفي آخر الشهر نبعتله الفاتورة بكل اللي صرفه خلال الشهر".

ممكن تعرف تفاصيل أكتر عن تاريخ الكريدت كارد من هنا