إيه هو تاريخ ماكينة الصرف الآلي المعروفة بالـ ATM؟

تاريخ النشر: في طرائف وعجائب

إيه هو تاريخ ماكينة الصرف الآلي المعروفة بالـ ATM؟

ايه حكاية أول ATM في العالم؟

مين فينا مش حافظ أماكن كل مكن الـ ATM القريبة من بيته وشغله وأي مكان بيروحه كتير، طيب عمرك فكرت حياتنا كانت هتبقي عملة ازاي من غير المكنة اللي بتنقذنا على طول والبنوك قفلة.

 

ماكينة سيتي بنك:

 

لوثر جورج سيمجيان كان أول واحد يفكر فى الموضوع ده وفعلا اخترع مكنة وركبها فى سيتي بنك سنة 1939 في نيويورك، وفكرته كانت عبارة عن ألة بتدخل جوه حفرة فى الحيطة، بيقدر العميل يسحب منها فلوسه من غير مايدخل البنك، لكن للأسف اتشالت بعدها ب 6 شهور بس لأن الناس محبتهاش وعدد قليلة جدا اللي حاول يستخدمها.

 

بعد أكتر من 25 سنة رجعت تاني الفكرة لكن فى بريطانيا لواحد اسمه جون شيفرد بارون، كان بيشتغل فى شركة بتطبع الفلوس، وفي يوم احتاج لفلوس لكن وصل للبنك بعد قفله بدقايق، ومن هنا جتله الفكرة وفعلا عرضها على مدير بنك باركليز البريطاني اللي وافق عليها وطلب منه صناعة أول نموذج ليها.

 

ماكينة الشوكولاتة:

 

بارون احتاج سنتين عشان يصنع أول مكنة، وفى حوار ليه مع الـ BBC  سنة 2007 وهو بيحتفل بمرور 40 سنة على اختراعه، اعترف أنه استلهم الفكرة من مكنة شراه الشوكولاتة، بس بدل ما تحط فلوس يطلعلك شوكولاتة هيطلعلك فلوس من رصيدك، وادي لفكرته أسم "بنك مفتوح 24 ساعة 7 أيام في الأسبوع".

 

أول ماكينة  في العالم :

 

أول ماكينة اتركبت فى بنك باركليز في لندن سنة 1967، وافتتحها الممثل الكوميدي ريج فارني، فى حفلة افتتاح كبيرة، وسمها بارون فى الأول DACS De La Rue Automatic cash System، وربطها باسم الشركة اللي كان بيشتغل فيها" DE la Rue"، وبعدها اتغير لاسمها الحالي

Automated Teller Machine ماكينة الصراف الآلي، واستخدم الناس شيكات خاصة معالجة بمادة كربون14 عشان يسحبوا بيها الفلوس.

 

بارون احتاج سنتين عشان يصنع أول مكنة

 

سر الرقم السري:

 

حياتنا كلها مليانة ارقام سرية طويلة، ماعدا باسورد ال ATM، المكونة من 4أرقام بس، فى الحقيقة هما كانوا 6 فى الأول لكن بارون لقي ان مراته مبتقدرش تحفظ أكتر من 4 أرقام فقللهم عشان خاطرها.

 

دخول المكن لأمريكا: 

 

دخلت الـATM أمريكا سنة 1969، بعد ماعدل عليها المهندس دونالد ويتزل في دالاس وركب أول مكنة في فرع البنك الكيميائي في مركز روكفيل في نيويورك.

 

تطور الماكينة:

 

جيمس جودفيلو  اخر أسم فى ليستة مخترعين ال ATM، فهو اللي طور فيها واخترع استخدام كروت بلاستك مخرمة بدل الشيكات، بعد ما فكر فى الأول يخلي تعريف العميل عن طريق نبرة صوته، أوبصمة عينه، لقى أن الكروت عملية أكتر.



 

عايز تعرف بقي إيه حكاية أول كريدت كارد فى العالم تقدر تقرأها هنا.