الجبلاية هتسيطر على غضب كيروش قبل ماتش مصر والسنغال؟

"مصر في كأس العالم" حلم كل مصري حاليًا إننا نتأهل للمونديال للمرة التانية على التوالي، وفاضل ماتشين فاصلين مع السنغال هما اللي هيحدووا المتأهل، وخلاص العد التنازلي بدأ والماتشين ميعادهم 25، و29 مارس 2022 في المرحلة النهائية من تصفيات قارة إفريقيا لنهائيات كأس العالم.

ايه الجديد اللي حصل بين مدرب المنتخب الوطني، البرتغالي كارولس كيروس، وبين اتحاد الكرة دا اللي هتعرفه دلوقتي مع اخر المستجدات قبل مبارة مصر والسنغال.

اعرف أكتر عن تاريخ مباريات مصر والسنغال من هنا: قبل مباراة مصر والسنغال.. الأرقام في صالح مين؟

خناقة بين اتحاد الكرة وكارلوس كيروش

كيروش طلب قبل كدا إن استاد القاهرة يتم إغلاقه قبل معسكر الفراعنة بأسبوعين، علشان أرضيته تكون في أفضل حالاتها قبل ماتش السنغال الأول في تصفيات الدور الحاسم.

كارلوس كيروش بلغ وزير الرياضة الدكتور أشرف صبحي بطلبه الضروري دا لكن الجبلاية لغاية دلوقتي لسه بتسمح بوجود ماتشات على أرضية استاد القاهرة ومنها مثلًا ماتش الزمالك والجونة  امبارح الاتنين. 

وكمان في ماتش يوم السبت الجاي بين الزمالك والوداد في دوري أبطال أفريقيا، وغالبًا دي هتكون المباراة الأخيرة اللي هتتلعب على استاد القاهرة قبل ماتشين السنغال.

كيروش بيرفض مقترح الجهاز الفني

كمان من الحاجات اللي لازم تعرفها قبل ماتش مصر والسنغال إن كارلوس كيروش رفض مقترح جهازه المعاون، بتواجد 28 لاعب في معسكر مباراتي السنغال، لأنه مش بيفضل تواجد عدد كبير في المعسكرات خاصة إن المنتخب مش في بطولة مجمعة.

وطلب كيروش إن معسكر منتخب مصر في القاهرة يكون فيه ترتيبات خاصة وضوابط معينة علشان المواجهة المصيرية في 25 و29 مارس الجاري.

السنغال فازت بكأس الأمم الأفريقية

وكانت مصر خسرت من السنغال بركلات الترجيح في المباراة النهائية لبطولة كأس الأمم الأفريقية في الكاميرون، ومنتخب الفراعنة منتظر ياخده بتاره من أسود التيرانجا لما يتأهل على حسابهم ويروح كأس العالم.

10 محترفين طلبهم كيروش

ودي القايمة اللي حدها كارلوس كيروش للاعيبة اللي هيضيفهم للمعسكر من الخارج:

• محمد صلاح (ليفربول الإنجليزي).
• أحمد حسن كوكا (قونيا سبور التركي).
• محمد النني (آرسنال الإنجليزي).
• مصطفى محمد (جالاتا سراي التركي).
• سام مرسي (إيبسويتش الإنجليزي).
• عمر مرموش (شتوتجارت الألماني).
• أحمد ياسر ريان (ألتاي سبور التركي).
• كريم حافظ (يني مالتيا التركي).
• أحمد حجازي (اتحاد جدة السعودي).
• مصطفى فتحي (التعاون السعودي).

تدريبات المنتخب على ملعب ايه؟
 

حسب التقارير، البرتغالي كارلوس كيروش المدير الفني لمنتخب مصر، لسه بيختار بين ملعب الدفاع الجوي وبتروسبورت لاستضافة تدريبات المنتخب في المعسكر، والفراعنة هيخوضوا تمرين واحد بس على استاد القاهرة خوفًا على أرضيته من الإرهاق 

 اعرف أكتر عن تاريخ مواجهات الفراعنة وأسود التيرانجا من هنا: تاريخ مواجهات مصر والسنغال: اتقابلوا 14 مرة