10 أسئلة في الانترفيو ازاي تجاوب عليها
تاريخ النشر: 01 فبراير 2022 طرائف وعجائب
تجاوب ازاي على سؤال: ايه هي نقط ضعفك؟
اعرف ايه هي الإجابات المثالية على كل الأسئلة اللي بتتسألها في الانترفيو وازاي تفوت منها وتتقبل في الوظيفة.
1- سبت شغلك الأخير ليه؟
أي إجابة هتقولها حاول ما تتكلمش وحش عن صاحب عملك السابق أو تتكلم عن فشلك في أي حاجة، ممكن تقول: أنا بدور على تحدي جديد مناسب ليا، واتعلمت من شغلي اللي فات بما فيه الكفاية.
2- ايه اللي شدك في الوظيفة؟
لما عملت بحث عن وظايف شوفت الوظيفة دي وشدتني تحديدًا لأن المهارات المطلوبة مناسبة ليا، وأنا حابب أشتغل مع شركة رائدة في مجال .... وخبرتي تسمحلي بكده.
3- ايه اللي يخلينا نقبلك في الوظيفة؟
أنا مهتم بالوظيفة وعندي الشغف وكمان خبراتي ومؤهلاتي تسمحلي بكدا، ومتحمس لبداية جديدة.
4- ايه الجديد اللي بتدور عليه في شغلك الجديد؟
حاول تكون أمين وصريح وموضوعي جدًا وأنت بتجاوب على السؤال دا تحديدًا يعني لو المرتب في الشغل القديم ماكنش مناسب ليك أتكلم في كدا أو لو كانت طريقة التعامل بشكل عام مش مناسبة ليك.
5- ايه هي أبرز إنجازاتك؟
لو كنت حديث التخرج اتكلم عن الأنشطة اللي قمت بيها في الجامعة أو درجاتك أو الأدوار الفعالة اللي عملتها لكن لو كان عندك خبرة مهنية فاتكلم عن إنجازاتك في الشغل بكل ثقة.
طب لو اتسألت عن المرتب المتوقع ايه أفضل إجابة اعرف أكتر من هنا، 6 أسئلة وأجوبة عن المرتب، ازاي ترد عليهم في الانترفيو!
ماتقولش نقط ضعفك ايه في الانترفيو خلي بالك من الفخ
6- ايه هي أبرز نقاط قوتك؟
مجتهد – ذكي – اجتماعي – بتأقلم بسرعة – ملتزم – طموح.
7- ما هي أهم نقاط ضعفك؟
السؤال دا بيكون فخ حاول ماتتكلمش في نقاط ضعفك تمامًا لأن دا مش اعتراف، حاول تغير السؤال لصالحك وقول: أنا بهتم بالتفاصيل جدًا وطموح ومهتم أخوض تجارب جديدة في حياتي.
8- بتعرف تشتغل تحت ضغط؟
أنا مش بخاف من الضغط أو مش بيشكلي مشكلة لأني بحب شغلي وبحب أهتم بالجودة والالتزام بالمواعيد وجدير بالثقة في تكليف المهام.
9- ساعات العمل اللي بتفضلها؟
خليك مرن وأنت بتجاوب السؤال دا ولو عندك أي التزامات ياريت تتكلم فيها في الانترفيو علشان تكون كل حاجة واضحة.
10- هل عندك أسئلة حابب تقولهالي؟
لازم قبل ما تروح الانترفيو تكون عامل السيرش بتاعك عن الشركة بالشكل الكافي علشان لما تتسأل سؤال زي كدا يكون في بالك أسئلة كويسة تعرف تطرحها وده بيبين إنك مهتم وجاد.
