7 حاجات لازم تعملها لو قطة خربشتك: وسعر المصل

مين فينا مبيحبش القطط؟ وحتى لو مبتحبش القطط فأكيد في قطة فارشة بعيالها على باب شقتك بس حبتها ولا محبتهاش (على رأي مدحت صالح ) من الآخر مفيش هروب من خربشة القطط.

 وأكيد اتعرضت أنت أو حتى من اللي تعرفهم لخربشة في ايدك أو في رجلك أو حتى في وشك قبل كدا .. بس ياترى ايه هي الإجراءات اللي لازم تعلمها لواتعرضت لخربشة القطط.

.في المقال ده هتعرف كل حاجة عن خربشة القطط بداية من الخربوش لغاية ما تخف و نقولك حمدلله على السلامة .

أسباب خربشة القطط

ببساطة القطط موجودة حوالينا في كل حته في البيت، في العمارة، وفي الشارع و في أسباب كثيرة ممكن ينتج عنها خربشة القطط.

• أولا: القطط بتحب تلعب جدا بس غالبا بتلعب بظوافرها مع صاحبها وممكن وهي بتلعب معاه تخربشة بداية من الخربوش البسيط وصولا إلى الخربوش الشديد.
• ثانيا:  القطط في بعض الأحيان بتكون غضبانة جدا في اللحظة دي لو قربت من القطة ممكن تخربشك .
• ثالثا: لو عندك اتنين قطط بيتخانقوا مع بعض خناقة جامدة .. اوعى تدخل ما بينهم عشان هتزعل و تجيب ناس تزعل.
• رابعًا: لو قطط في موسم تزاوج إوعى تقربلها عشان سعتها أأنت اللي هتزعل

تعمل إيه لو اتعرضت لخربشة قطط؟

إذا كان القط اللي خربشك هو قط منزلي واخد كل تطعيماته لغاية آخر لحظة في الحالة دي مفيش قلق و كل اللي هتعمله إنك تغسل الجرح بمية وخلاض.

إنما لو كان القط اللي خربشك قط من الشارع أو قطتك بس مش مطعمة أو مفوته شوية جرعات من تطعيماتها هنا بقى في شوية خطوات لازم تعملها لو اتعرضت لخربشة القطط. 

7 حاجات لازم تعملها لو اتعرضت لخربشة القطط

1- أول حاجة لازم تعملها هي إنك تحدد عمق الخربوش. فلو كان مجرد خربوش صغير في الحالة دي اغسله بالمية والصابون, أما لو كان خربوش كبير و نزل من رجلك دم كتير فمن الأفضل إنك تروح المستشفى تعرض الموضوع على دكتور جراحة

2- سواء الجرح بسيط أو قوي مهم جدا إنك تروح لأي مستشفى حكومي خلال 24 ساعة من الإصابة عشان تأخد مصل الحيوانات

3- في حالة إنك مأخدتش المصل خلال 24 ساعة يبقى وقته انتهى إلا إذا حددلك دكتور جراحة إنك محتاج تأخد المصل.

4- لو رحت لمستشفى خارجية و مر وقت كبير على ميعاد المصل تأكد إنك تأخد معاك الروجته و أنت رايح تاخد المصل لأنك في الحالة دي لو مأخدتهاش هتضطر تكشف تاني في المستشفى عشان يحددلك هتأخد المصل ولا لأ.

5- لو اتعرضت لخربشة تانية خلال شهر من تطعيمك مش هتكون محتاج تطعم مرة ثانية لكن بعد شهر من تطعيمك لو اتخربشت تاني لازم تروح و تأخد المصل تاني.

6- المصل بتأخده لو اتعرضت لأي خربشة أو عضة من كلب أو قطة أو فار .

7- لو اتسببت خربشة القطط في تورم أو التهاب أي جزء من الجسم اعرضها على دكتور جراحة وهو هيكتبلك على أدوية تخفف التورم زي الفينترن و أي مضاد حيوي تاني على حسب سوء حالتك.

خطوات تمشي عليها عشان تأخد مصل الحيوانات 

• خلال 24 ساعة من تعرضك للخربشة روح لأى مستشفى حكومي قريبة منك وهناك اسأل على مكان الحصول على المصل.
• كل اللي بتعمله إنك بتقطع تذكرة مصل مجانية و بيدوك ورقتين منهم واحدة للدكتور و واحدة هتكون معاك تأخد بيها جرعات المصل.
• و لو رحت للمستشفى و كانت إصابتك شديدة بتتعرض الأول على طبيب جراحة و بتدفع كشف 5 جنية و لو عندك جرح محتاج تغير عليه هتدفع  25 حنية غيار على الجرح.
• بتأخد تطعيمك في شكل حقن في الدراع و بتاخدها على خمس جرعات في أوقات مختلفة

لو الجرح بسيط أو عميق

لو الجرح بسيط بتغسله بمية وصابون و بتسيبه في الهواء عشان ينشف.

 إنما لو الجرح عميق و أنت لازم تخرج بره البيت ساعتها بتحط عليه "بيتادين" أو مضاد حيوي حسب ما يوصفلك الدكتور الجراح و ويُفضل تغطي الجرح و بعد مدة محددة يقولك عليها الدكتور تسيبه معرض للهواء عشان ينشف وده طبعا على حسب حالة الجرح. 

مش بتحتاج لأي تأمين صحي عشان تاخد التطعيم لأنك بتاخدها في عيادة الطواريء , و لو أنت مش مصري كل اللي هتعمله إنك تروح بالباسبور .

المصل عبارة عن ايه؟

المصل عبارة عن حقنة تيتانوس عشان يحمي الجسم من أي تلوث ممكن يكون دخله.

 و 5 حقن Rabies  (سعار) للحمایة من السعار و دي بتتاخد على فترات متباعدة وهي مش زي ما بيتقال عليها ب(عشان متتحولش كلب أو قطة)  لكنها  بتمنع أي تشنجات أو ترسب للفيروسات ممكن يحصل في الجسم على المدى البعيد. 

ازاي تتجنب خربشة القطط 

• لو أنت بتربي قطط فمن الضروري إنك تحافظ على نظافتها باستمرار و متنساش تقص ضوافرها لأنها بتجمع ميكروبات تحتها ممكن تتسبب في العدوى أو الالتهابات.
• أما لو مش قطتك وقطة قاعدة بعيالها في الشارع فابعد عنها من سكات وبكدة أقدر أقولك حمدلله عالسلامة.
• و لكن ده مش معناه انك متربيش قطط .. لأ ربي طبعا بس خد حذرك عشان الحرص واجب.

زي ما اتكلمنا عن القطط اعرف كمان عن الكلاب من هنا: ليه تربي كلب؟ 5 حاجات بيقدمهالك كلبك ببلاش