ازاي تفتح حساب مجاني في البنوك المصرية؟

بمناسبة اليوم العالمي للادخار البنوك هتسمحلك النهاردة ولمدة معينة إنك تفتح حساب مجاني ، وفرصة ليك النهاردة، الاتنين 17 أكتوبر 2022، ولغاية نهاية شهر أكتوبر إنك تقدر تفتح حساب بنكي مجانًا.

لو لسه معندكش حساب في البنك خلينا نقولك إن اليوم العالمي للادخار بيقدملك فرصة فتح حساب مجاني في البنك، ودلوقتي هنعرفك كل التفاصيل هنا في بلوج فايدتي.

افتح حساب مجاني في البنك

بمناسبة الأسبوع العالمي للشمول المالي، واليوم العالمي للادخار اللي بيكون تحت رعاية البنك المركزي المصري.. 

قررت البنوك العاملة في السوق المصري إنها تقدم فرصة لعملائها خلال الفترة اللي احنا فيها دي وحتى ٣١ أكتوبر إتاحة مجموعة من الخدمات و المنتجات اللي البنوك بتقدمها بشكل مجاني. 

اعرف أكتر يعني ايه شمول مالي من هنا: يعني ايه شمول مالي وليه الدولة بتحاول تطبقه في الفترة دي!

ايه هي الخدمات اللي هتقدمها البنوك مجانًا لنهاية أكتوبر؟

هتقدم البنوك خلال اليوم العالمي للادخار مجموعة من الخدمات والمنتجات المجانية  هنقولهالك في السطور الجاية.. 

• خدمة فتح حساب مجاني من غير مصاريف و من غير حد أدنى للفلوس.
• إصدار محافظ إلكترونية.
• الاشتراك في خدمة الانترنت والموبايل البنكي مجانًا.
• وكمان البنوك هتعفيك من بعض رسوم الخدمات البنكية المختلفة.

لو عاوز تحصل على قرض أو شهادة استثمار تقدر تعرف كل المنتجات البنكية من البنوك المصرية وتقارن ما بينها من وأنت في مكانك وكمان تقدم عليها أونلاين من هنا

العروض دي مستمرة لغاية امتى؟

لغاية نهاية شهر أكتوبر بس .

يا ترى امتى تقدر تفتح حساب مجاني في البنك؟

البنك المركزي حدد ٦ فعاليات لدعم الشمول المالي في مصر بشكل سنوي.. 

البنك المركزي بيسمح فيها للبنوك إنها تتواجد بره فروعها، و تقدر تروج لمنتجاتها، عشان تحفز العملاء على فتح حسابات جديدة في البنوك بتسهيلات وإعفاءات من المصاريف الإدارية.. و كل ده تحت مظلة الشمول المالي. 

اعرف معلومات أكتر عن البنوك من هنا: حساب جاري بحد أدنى 500 جنيه: اعرف اقل 10 بنوك في الحد الأدنى

يعني ايه الشمول المالي؟ 

• هي مبادرة أطلقها البنك المركزي ، واستراتيجية مشي عليها.. كان الهدف منها
• انه يقدر يحقق استقرار مالي في القطاع المصرفي و المالي في مصر .
• يقدر يلبي الاحتياجات المالية للفئات المهمشة.
• واعتمد البنك المركزي على البنوك كشريك أساسي لتحقيق الشمول المالي.
• و ده طبعا من خلال تشجيعها على إنها تقدم تسهيلات وإجراءات للعملاء تساعدهم على انهم يوصلوا لأفضل الخدمات البنكية و المالية اللي بتلبي احتياجاتهم.

كل اللي هتعلمه إنك هتروح البنك وبالبطاقة بس تقدر تفتح حساب بنكي مجاني.

ايه هي فعاليات دعم الشمول المالي في مصر؟ 

حدد البنك المركزي الفعاليات الـ 6 للشمول المالي في أوقات مختلفة من السنة من شهر مارس لحد شهر ديسمبر هنقولك عليها وهي: 

1- يوم المرأة العالمي: الفعالية بتستمر من ٨ مارس لغاية ٣١ مارس .

2- اليوم العربي للشمول المالي: الفعالية بتستمر من ١ إلى ٣٠ إبريل .

3- اليوم العالمي للشباب: الفعالية بتستمر من ١ أغسطس لغاية ١٥ أغسطس.

4- عيد الفلاح: الفعالية بتستمر من ١ سبتمبر لغاية ١٥ سبتمبر. 

5- الأسبوع العالمي للشمول المالي واليوم العالمي للادخار: الفعالية دي بتكون من ١٥ أكتوبر لغاية ٣١ أكتوبر.

6- اليوم العالمي لذوي الهمم: الفعالية دي بتكون متاحة من ١ ديسمبر لحد ١٥ ديسمبر.