كل اللي عاوز تعرفه عن معرض الكتاب الدولي 2022

معرض الكتاب الدولي 2022 هيبدأ الخميس 27 يناير وهيستمر لغاية يوم 7 فبراير 2022 تحت شعار "هوية مصر.. الثقافة وسؤال المستقبل"، والسنة دي هتكون مختلفة شوية عن السنين اللي فاتت.

شخصية معرض الكتاب السنة دي "يحيى حقي"، والمختلف في الدورة دي إن هيكون في معرض كتاب الطفل وتم اختيار الكاتب عبدالتواب يوسف شخصية المعرض المخصص للأطفال.

مواعيد المعرض وتروح ازاي؟

المعرض هيستقبل الزوار من يوم 27 يناير لكن الافتتاح بيكون قبلها بيوم، وبالنسبة لساعات العمل بتكون من 10 الصبح لـ 8 بالليل، لكن يوم الجمعة البداية هتكون من 1 الضهر، ويوم الخميس والجمعة بيتمد ساعة إضافية يعني بيقفل على 9.

كمان هيكون في خطوط مواصلات من الميادين الرئيسية متخصصة من وإلى معرض الكتاب.

دور النشر اللي هتشارك في معرض الكتاب الدولي 2022

• 1063 ناشر بينهم عرب وأجانب.
• 879 جناح.
• 292 دار نشر مصري.
• عدد الناشرين المصريين لكتاب الأطفال والوسائل التعليمية وكتاب التعليم المدرسي 89 دار نشر.
• 97 دار نشر للكتب الإسلامية والتراث.
• لسور الأزبكية 49 مكتبة.
• ، وعدد الناشرين للكتب الأكاديمية 49 ناشر.
• عدد الناشرين العرب 298.
• دار نشر واحدة للكتب الصوتية.
• اتنين دور نشر لذوي القدرات الخاصة.
• 7 مؤسسات صحفية.

سعر تذكرة معرض الكتاب 2022

سعر تذكرة المعرض 5 جنيه بس، وممكن تحجز أكتر من تذكرة للأيام المختلفة اللي هتزور فيها المعرض لكن خليك عارف إن الدخول والخروج هيكون بتذكرة واحدة بس ومش مسموح للشخص إنه يدخل أكتر من مرة بتذكرة واحدة.

أنت كمان ممكن تحمل أبلكيشن معرض القاهرة الدولي للكتاب Cairo Book Fair‏ من هنا وتعرف أكتر

تحجز ازاي تذكرة معرض الكتاب 2022

عن طريق المنصة الإلكترونية للمعرض، هتسجل البيانات الشخصية اللي بتكون: البريد الإلكتروني ورقم الموبايل، وتختار الأيام اللي عاوزها وبتدفع من خلال فوري أو فيزا.

وكمان متاح إنك تحجز من شباك جنب أبواب المعرض لكن بيتم أون لاين هو كمان، وتقدر تدخل على الموقع من هنا وبعد ما تسجل هيتبعتلك نسخة من التذكرة في رسالة على واتساب، ونسخة على البريد الإلكتروني، تشمل تفاصيل يوم الدخول والوقت المحدد للزيارة.

بمناسبة كلامنا عن الكتاب اعرف أكتر من هنا، 5 كتب لمساعدتك في إدارة ميزانيتك