مواعيد اجتماعات وقرارات البنك المركزي المصري في 2021

البنك المركزي هو المسؤول عن كل تفاصيل الفلوس في البلد، زي مواعيد طباعتها أو البلد محتاجة تطبع فلوس قد ايه أصلاً؟ 

كمان هو اللي بيحدد طريقة شغل البنوك وقوانين كل التعاملات البنكية، زي مثلاً إلغاء أو تفعيل عمولة السحب على الـ ATM ، وأكيد هو اللي بيقرر معدل سعر الفايدة اللي بيشتغل بيها البنوك سواء هيزيد ولا هيقل.

مين المسؤول عن قرارات البنك المركزي؟

محافظ البنك المركزي هو المسؤول عن إصدار القرارات، وبيتم تعيينه عن طريق رئيس الجمهورية لمدة 4 سنين، وطبعاً بيبقى حد له خبرة في إدارة البنوك، وحالياً محافظ البنك المركزي هو أستاذ طارق عامر، مدير البنك الأهلي السابق.

من بداية تأسيس البنك المركزي المصري سنة 1960، عدى عليه 13 محافظ لغاية دلوقت، وتقدر تعرف أكتر عنه من هنا، نبذة عن البنك المركزي المصري.

من أهم القرارات اللي بياخدها البنك المركزي هي تحديد سعر الفايدة وده اللي بيحدد أسعار الفايدة على الإيداع أو الإقراض هتتغير ولا لأ،واللي البنوك بتسترشد بيها عشان تحدد أسعار الفوايد الخاصة بيها، وده بيكون حسب حاجات كتير بتحصل على مستوى البلد أو المستوى العالمي زي معدلات التضخم وقانون العرض والطلب.

وتقدر تعرف أكتر عن التضخم من هنا،  يعني إيه تضخم، وإيه هي أنواعه؟

وعن العرض والطلب من هنا، إيه هو قانون العرض والطلب، وازاي بيأثر على الأسعار؟

من أهم القرارات اللي بياخدها البنك المركزي هي تحديد سعر الفايدة وده اللي بيحدد أسعار الفايدة على الإيداع أو الإقراض هتتغير ولا لأ

والقرارات الخاصة بأسعار الفايدة دي سواء هتزيد أو هتقل أو هتثبت بتكون من خلال اجتماعات بيتم فيها مناقشة كل حاجة متعلقة بالفلوس، والاجتماعات دي بتتعمل في مواعيد محددة على مدار السنة، بالظبط كل 45 يوم، وفى الغالب بيكون يوم خميس.

مواعيد اجتماعات البنك المركزي للنصف الثاني من 2021:

1. 5 أغسطس 2021
2. 16 سبتمبر 2021
3. 28 أكتوبر 2021
4. 16 ديسمبر 2021

وتقدر تعرف مواعيد الاجتماعات وقرارتها من الموقع الرسمي لللبنك المركزي.

وأهم قرارات البنك المركزي في اجتماعه الأخير يوم  5 أغسطس 2021، كانت كالاتي:
 

إبقاء سعر عائد الإيداع عند  8.25 ٪ والإقراض لليلة واحدة عند 9.25 ٪ وسعر العملية الرئيسية للبنك المركزي 8.75 ٪ للمرة السادسة على التوالي من شهر أبريل 2021.