ازاي تحارب غلاء الأسعار على طريقة عمرو أديب؟

اتكلم الإعلامي المصري عمرو أديب في برنامجه "الحكاية" على قناة "ام بي سي مصر" الفضائية، عن ثقافة التوفير في الظروف الاقتصادية اللي بيعيشها العالم حاليًا وغلاء الأسعار، وقدم شوية نصايح للمصريين من وجهة نظره الشخصية.

عمرو أديب ركز في كلامه عن الظروف الاقتصادية اللي بيمر بيها العالم بعد الحرب الروسية الأوكرانية، وازاي الناس تقدر تحافظ على فلوسها في ظل أجواء الحرب والأزمة الاقتصادية.

تفتكر مين اللي بيتحكم في الأسعار؟ اعرف أكتر من هنا: مين المتحكم في الأسعار؟ وإيه اللي بيأثر عليها؟

أنت عايش في عصر حرب

وقال أديب في برنامج "الحكاية" إن الأسعار زادت في مصر والعالم خلال الفترة الأخيرة بشكل كبير جدًا وكل مكان في الدول الغنية والفقيرة والاشتراكية والرأسمالية يعني كل الأنظمة مهما كانت توجهاتها وقوتها.

وكمل كلامه: الفواتير زادت المياه والكهرباء والغاز من بعد العيد عندنا زيادة في منتجات الألبان من 10-15% وجايز تزيد مرة أخرى. أنت عايش في عصر الحرب، ولازم أنت وعيلتك وناسك تقولوا لا مش هنشتري الحاجة دي بالطريقة دي تاني.

عمرو أدب: أنا مش بمهد التمهيد ده لحاجة هتحصل، أنا بتكلم على حاجة حصلت

مش قضية معاك فلوس أو لا

عمرو أديب وجه كلامه للمواطن المصري وقال: هي مش قضية معاك فلوس أو لا هي قضية التدبير. أول ما بكرة يبقى غامض امسك في فلوسك. 

واستعان الإعلامي المصري بمثال عن رئيس الوزراء البريطاني بوريس جونسون من يومين لما طلع قال: أسف في ناس مش هنعرف نعملها حاجة. وابتدينا نتكلم بثقافة الحرب فعلا. أنت في مصر هنا ثقافتك مختلفة.

نصائح رجال الأعمال عن الاستثمار اعرف أكتر من هنا: أهم 5 نصايح عن الإستثمار من رجل الأعمال وارن بافت

لازم يكون عندنا ثقافة الأزمة

عمرو أديب تابع كلامه واصل: «هنا ده مش أسلوبك، أنت هناك أسلوبك مسؤول مسؤولية تامة كاملة عظيمة عن كل البشر، ولكن هنا تقوله في حرب ويقولك أنا مالي. يجب أن يكون لدينا ثقافة الأزمة.

وفي نهاية كلامه قال عمرو أديب إنه بيقابل ناس من مختلف الطبقات الاجتماعية، والكل بشكل عام  بيفكر ويقول هيعمل ايه "آسف أن أحاول أقنعك تأخذ بالك على فلوسك. أنا مش بمهد التمهيد ده لحاجة هتحصل، أنا بتكلم على حاجة حصلت".