ازاي سلسلة صيدليات 19011 فلست؟

إفلاس شركة "ألفا" اللي بتملك سلسلة صيدليات 19011 الخبر الأبرز خلال الساعات الأخيرة واللي ناس كتير مهتمة بيها وبتدور عليه على محرك البحث "جوجل" هنقولك على كل التفاصيل.

خلينا نقولك إن في البداية كدا إن المحكمة الاقتصادية أصدرت حكمًا بإفلاس سلسلة صيدليات 19011، وتعيين قاضيًا للتفليسة.

مديونية بـ 7 مليار جنيه

الدكتور حاتم البدوي، سكرتير شعبة الصيدليات باتحاد الغرف التجارية، قال إن شركة ألفا اللي بتملك سلسلة صيدليات 19011، عليها مديونية بـ7 مليارات جنيه أغلبها من البنوك.

وأكد البدوي في تصريحات صحفية إن أغلب الديون على سلسلة صيدليات 19011، لصالح بنوك وشركات توزيع أدوية كبرى، واللي حصل دا كارثة خاصة على شركات التوزيع كمان.

شركات التوزيع في ورطة

في شركات كبيرة اتعرضت لأضرار ضخمة بسبب إفلاس صيدليات 19011 زي: المتحدة أو ابن سيناء وليها مديونيات بتتجاوز المليار جنيه، والشركات دي مش هتحصل على فلوسها لأن 19011 أعلنت إفلاسها، ولو حصلت على فلوس هتكون قليلة جدًا.

تحذير من شعبة الصيدليات

الشعبة كانت حذرت قبل كدا من طريقة شغل صيدليات 1901 وقالت إنهم بيحتكروا السوق وبيعملوا استحواذ على الأدوية وبيدفعوا أرقام مبالغ فيها جدًا في الإيجارات.

ولو ماتعرفش برضو خلينا نقولك إن صيدليات 19011 إيجار مش تمليك، وحاليًا مغلقة، وصاحب الصيدلية الأصلي ما يقدرش يدخل الصيدلية ولا يحصل على الإيجارات المتأخرة وهيروح المحكمة علشان يعرف ياخد حقه.

اقرأ كمان: 7 حاجات لبداية مشروع فاشل اوعى تعملها

تعرف ايه عن صيدليات 19011؟

صيدليات 19011 دخلت سوق الدواء في مصر بالاستحواذ على سلسلة صيدليات "رشدي"، اللي كان عليها ديون للبنوك بتتخطى المليار جنيه، واستحوذت كمان على سلسلة صيدليات "علي ايمدج".

صيدليات 19011 عملت حملات دعائية ضخمة بهدف إنها تتخطى وتنافس سلسلة صيدليات "العزبي" اللي منتشرة في مصرمن سبعينيات القرن الماضي، وبتمتلك حوالي 150 فرعًا، وفي المقابل صيدليات 19011 ليها حوالي 100 فرع تقريبًا في كل أنحاء مصر.