قاموس المصطلحات البنكية اللي محتاج تفهمها (الجزء الأول)

موظفين البنوك أوقات بيكون ليهم مصطلحاتهم الخاصة بحكم شغلهم جوه البنك بس احنا مابنفهمش كلامهم بشكل كبير إلا بعد تكرار مشوار البنك أكتر من مرة، عشان كده احنا هنقولك على شوية مفاهيم من قاموس البنوك بيقولها موظف البنك وانت ممكن تبقى مش عارف معناها زي مثلاً:

قاموس المصطلحات البنكية
 

حساب جاري Current Account

ده الحساب البنكي اللي عن طريقه بتعمل سحب وايداع من غير ما يكون فيه أي فوايد على ايداعاتك، زي الحساب اللي بتقبض بيه مرتبك، و ممكن تطلع دفتر شيكات على الحساب ده وممكن كمان يتم فتح الحساب ده للأشخاص الاعتباريين زي الشركات.

حساب توفير Saving Account

الحساب ده عن طريقه بتقدر تعمل سحب وايداع عليه براحتك بس بينزل فايدة على الفلوس اللي موجودة كل سنة، وممكن تنزل كل شهر او كل 3 شهور او كل 6 شهور او كل سنة على حسب نوع حساب التوفير و تقدر تستفسر من البنك العائد بينزل كل قد ايه، والحساب ده ممكن يتفتح للقُصّر عن طريق الوصي.

أعرف أكتر عن الفرق ما بين الحسابين من هنا، إيه الفرق ما بين حساب التوفير والحساب الجاري؟

حساب جاري مدين Overdraft Account

وده حساب جاري بيتفتح بضمان وديعة أو شهادة استثمار، والميزة الأساسية فيه ان لو الرصيد المتاح في حسابك يساوي صفر فـ تقدر تعمل حاجة اسمها سحب على المكشوف، وهي انك تسحب اي مبلغ المهم مايكونش يساوي أو أكتر من مبلغ الضمان، وتسدد المبلغ بفايدة و عمولة محددة، وتقدر تسدد دفعة واحدة على عكس القرض اللي لازم تسدده على هيئة أقساط وإلا هتدفع عمولة سداد مبكر. (عكس القرض اللي لو سددته مرة واحدة بتدفع عمولة سداد مبكر)

رقم الحساب المصرفي الدولي IBAN

ده بديل لرقم الحساب عشان يسهل عليك عمليات تحويل الفلوس من بره مصر ويسرع تنفيذها وكمان يقلل من الأخطاء اللي كانت بتحصل قبل كده وبسببها بتتأخر عملية التحويل.
 

اعرف أكتر عن الرقم ده من هنا، ايه هو IBAN/ رقم الحساب المصرفي الدولي؟

اعرف الفرق بين الـ 3 مصطلحات بنكية دول من هنا:هل في فرق بين SWIFT وBIC و IBAN للبنك؟

الميزة الأساسية في الحساب الجاري المدين ان لو الرصيد المتاح في حسابك يساوي صفر فـ تقدر تعمل حاجة اسمها سحب على المكشوف

تظهير الشيك Check Endorsement

لو عايز تصرف الشيك اللي معاك من الـ ATM هيتطلب منك "تظهيره" ودي معناها انك تكتب على ضهر الشيك اسمك مرتين لو انت المستفيد من الشيك ده، وممكن المستفيد يظهر الشيك لشخص تاني ويقدر كل مستفيد يكرر الموضوع ده لعدد لا نهائي من الأشخاص.
 

تسطير الشيك Crossed Cheque
 

ممكن اللي بيكتب الشيك يعمل سطرين متوازيين في الشيك، وده معناه ان الشيك ده ماينفعش يتصرف كاش ولازم فلوس الشيك تنزل للمستفيد في حسابه وكمان الشيك ده لازم يتصرف في اليوم اللي مكتوب على الشيك ماينفعش قبل كده.

ماكينة P.O.S 
 

ودي ماكينات نقاط البيع اللي عن طريقها بتدفع فاتورتك في أي محل ببطاقات الدفع سواء خصم مباشر أو ائتمان، وبتشتغل بخط أي شركة من شركات الموبايل ولو انت صاحب محل ممكن تطلبها من أي بنك.

صندوق الاستثمار investment fund

هو عبارة عن وعاء مالي رأس المال فيه بيتحسب بالملايين وملك لعدد كبير من المستثمرين، وبيديره متخصصين وخبراء في التداول في البورصة دورهم انهم يدرسوا كويس ايه الشركات اللي ممكن يستثمروا فيها وعلى الأساس ده بياخدوا قرارات البيع والشراء مكانك وده بيقلل عليك مخاطرة التداول بدون خبرة كافية لو انت لسة بتبتدي في مشوار الاستثمار.

اعرف أكتر عن البورصة من هنا، إيه هي البورصة ؟ إزاي تبدأ استثمار فيها مع الأسهم!

شراء مديونية Buyout 
 

باختصار معناه انك ممكن تختار بنك يسدد ديونك اللي عند بنك تاني "بيشتري الدين اللي عليك"، وده مفيد في حالات كتير زي مثلا لو حبيت تاخد قرض من بنك وانت عليك اقساط في بنك تاني، فـ بدل ما تبقى بتسدد الأقساط لبنكين، البنك الجديد "بيشتري الدين" اللي عليك عشان تسدد كل حاجه في مكان واحد.