ازاي تختار عجلة مناسبة ليك من ناحية المقاس والنوع!
تاريخ النشر: 13 يناير 2022 نصايح ببلاش
ايه الفرق بين العجل الرود والهايبرد والماونتن؟
نفسك تشتري عجلة بس مش عارف ايه انسب مقاس ونوع ليك؟ ده اللي هنقولك عليه دلوقتي وكمان هتعرف ايه الفرق بين كل أنواع العجل، وليه الكاوتش ممكن يبقى رفيع أو عريض أو وسط.
1- العجل الرود
وبيتقال عليه برضو العجل "الريس"، وبيكون الكاوتش بتاعه رفيع لأنه متصمم أصلًا للطريق المستوي ومن أهم مميزاته أنه خفيف وسريع ويُعتبر الأنسب في عالم السباقات.
2- العجل الماونتن
عجل متصمم للطرق المتكسرة واللي مش مستوية، ومن مميزاته إنه عنده قدرة عالية في إنه يتحمل المطبات وكمان فيه مساعدين علشان يتحمل الصدمات والكاوتش فيه بيكون عريض، ومش كل شوية الكاوتش بتاعه يتخرم، وبيدي ثبات أكتر للعجلة يعني مش شوية رملة تزحلقك.
3- العجل الهايبرد
ودي عبارة عن خليط بين النوعين الرود والماونتن، وميزتها إنها سريعة تقريبًا زي الرود وكمان ثباتها زي الماونتن أما بالنسبة للكاوتش بتاعها فهو متوسط الحجم وبيديك ثبات على الطريق أكتر من الرود.
في طرق كتير عشان تستفيد من العجلة ممكن تقرأ عليها من هنا، ازاى توفر وتستفيد بالعجلة بتاعتك!
مين الأسرع فيهم؟
بالنسبة للسرعة فالماونتن سرعته متوسطة مقارنة بالرود والهايبرد، والرود هو الأسرع علشان كدا زي ما قلنالك بيستخدم في السباقات.
العجل الرود مافيهوش مساعدين لكن الهايبرد والماونتن فيهم
يا ترى كل العجل فيه مساعدين ولوك؟
لا، العجل الرود مافيهوش مساعدين لكن الهايبرد والماونتن فيهم، العجل الماونتن في منها بمساعد عادي وفي منها بمساعد لوك.
ايه هي ميزة المساعد اللوك؟
ميزته إنه لما بيتقفل سرعة العجلة بتزيد وده اللى بيميز العجلة اللى بمساعد لوك عن اللي بمساعد عادى لأن جهدك كله بيبقي رايح للبدال وأنت قافله، وكمان بتقدر تفتح المساعد لما تبقي ماشي في حته مكسرة.
ايه الفرق بين أنواع الفرامل في العجل؟
الفرامل الديسك بتبقي أنسب في العجل الماونتن لأنه تقيل فبيحتاج فرامل قويه زى الديسك والهيدروليك "فرامل الزيت" علشان توقفه بسرعة.
لكن العجل الرود خفيف مابيحتاجش فرامل بقوة الديسك علشان كده الفرامل بتبقي فيه عادية أقل حاجه بتوقفه واسمها فرامل "لقم / جلد" عبارة عن كاوتشيتين صغيرين بيقفلوا على الكاوتش فبيقف.
ازاى احسب مقاس العجلة المناسب ليا؟
فى ويبسايت متخصص فى العجل اسمه عجل مصر، عمل حاسبة مخصوصة للموضوع ده ممكن تستخدمها ببلاش من هنا، حاسبة حجم الدراجة .
قارن ما بين بطاقات الائتمان المختلفة على فايدتي لو معكش كاش عشان تشتري العجلة دلوقتي!
