تفتكر هي الكلاب بتكلف أصحابها كام فى يوم الكلب العالمي!

تعرف إنك لما تربي كلب ده هيحسن من نفسيتك؟ لإنك لما بتتعامل مع الكلاب ده بيرفع من هرمون الأوكسيتوسين، وده الهرمون المسؤول بنسبة كبيرة عن الترابط الإجتماعي وراحتك النفسية، وبما أن انهارده 26 أغسطس، اليوم العالمي للكلاب، هنقولك معلومات عن تكاليف تربية الكلاب وتفاصيل تانيه هتفيدك.

تربية الكلاب بكام؟

1- الأكل:

لازم تتأكد انك بتوفر لكلبك نظام غذائي متكامل، عشان ياخد كل العناصر الغذائية اللى بيحتاج لها، وبالتالي هيبقى أقل عرضة للتعب، وحاول متأكلش كلبك من بواقى أكل بيتك عشان جسمه مش مصمم لهضم النوع ده من الأكل، وكمان مش هيتسفيد منه حاجة، وأفضل نوع أكل للكلاب هو الأطعمة الجافة Dry Food، وبتتراوح سعرها من 200 لـ 1,000 جنيه.

ومن أشهر انواع الدراي فوود:

• بيتسيكو، دراي فود : 10 كيلو بـ 230 جنيه

• طعام مجفف بالدجاج، من دون كانينو : 1 كيلو بـ 45 جنيه

• كونغو للكلاب الكبيرة : 21 كيلو بـ 680 جنيه

• فوكر دراي فوود للكلاب الصغيرة : 13 كيلو بـ 790 جنيه

طيب تربي قطة بكام؟ اعرف أكتر من هنا: اعرف تكلفة تربية حيوانك الأليف المفضل في السنة: قطتك

ويفضل توفر لكلبك حلويات، وتبقى مكافأة ليه في فترة التدريب، وفي نفس الوقت بتكون مكملات غذائية ليه، ومن أشهر أنواعها:

• جروفي ميني رولز، 250 جرام بـ 55 جنيه

• بيرفيكتو، 20 شريحة دجاج، 200 جرام بـ 85 جنيه

2- الدكتور البيطري:

لازم قبل ما تربي كلب عندك في البيت، تروح بيه عند الدكتور علشان يكشف عليه وتتأكد ان صحته كويسة، ويفضل تعمله فحص شامل بشكل سنوي، وطبعا ده بجانب التطعيمات اللى لازم ياخدها كل فترة، وأسعارها بتتراوح ما بين:

• التطعيم الثنائي: 120-200 جنيه مصري

• التطعيم الخماسي: 140-220 جنيه مصري

• التطعيم الثماني: 180-300 جنيه مصري

• السعار : 50-90 جنيه مصري

3- إكسسوارات والعاب الكلاب:

السلاسل من أكتر الحاجات اللى بيحتاجها الكلاب، واللي يفضل تتغير مرة كل شهر أو شهرين، عشان تتأكد انها هتستحمل وخاصة لو الكلب حجمه كبير ومتوسط سعرها بيبقي 70 جنيه.