نصائح للاستثمار على المدى البعيد

الدنيا مبقاش فيها أمان وبقى لازم تعمل حساب لبكره عشان تقدر تغطي أي ظرف مفاجئ يجيلك، مش بس كفايه انك تحسب مصاريفك اليومية وتحوش قرشين من مرتبك كل شهر، بس كمان لازم تفكر في المستقبل وتدور على طرق مختلفة تساعدك تستثمر فلوسك.

واحنا هنقولك على 4 نصايح للاستثمار هتساعدك على المدى البعيد!
 

1  -   شهادات الاستثمار! 

ودي من أشهر طرق الاستثمار اللى ناس كتير بتروحلها، لأنك تقدر تفصلها على مزاجك، بمعنى لو معاك مبلغ كبير تقدر تقسمه على شهادات بمدد وفوايد مختلفة، وشهادات الاستثمار في منها 3 أنواع:
 

 شهادة الاستثمار يـ الفايدة الثابتة:

بمعنى ان المبلغ اللى بتربطه في شهادة،  بيطلع عليه أرباح كل شهر أو على حسب المدة اللى بتختارها، والفايدة بتكون ثابته طول مدة الشهادة.
 

 شهادة الاستثمار بـ الفايدة المتغيرة:
 

ودي الفايدة بتختلف على حسب  تغييرات وقرارات البنك المركزي.
 

 شهادة الاستثمار بـ الفايدة التراكمية:
 

ودي هتبقى اختيارك الأول لو عايز تحوش فلوس وتكسب منها على المدى البعيد، يعنى الأرباح هتتراكم وهتاخد في نهاية المدة المبلغ الأصلي وأرباحه.
 

اعرف أكتر عن شهادة الاستثمار التراكمية من هنا، ايه هى شهادة الاستثمار التراكمية؟
 

وكده هتبقي شغلت فلوسك وطلعلك أكتر من مبلغ من الفوايد علي مدد مختلفة، وممكن تعرف أكتر عن أنواع الفوايد المختلفة علي شهادات الاستثمار من هنا، ايه هى أنواع الفايدة على شهادات الاستثمار؟ 

قارن بين شهادات الاستثمار المختلفة في البنوك المصرية مع فايدتي قبل ماتقدم.

الشهادات أفضل طريقة للاستثمار، لإنك بتفصلها على مزاجك، ولو معاك مبلغ كبير بتربطه في شهادات بـ مدد وفوايد مختلفة

2- استثمر في بيتك!

لو عايش في بيت إيجار وعايز تستقر في حاجه ملك ليك بدل ما تضيع فلوسك كل شهر في الإيجار، ده هيبقى افضل استثمار ليك ولعيلتك، وفى نفس الوقت ممكن متضيعش كل فلوسك في سعر الشقه وتشطيبها، وتاخد جزء تحطه مقدم للشقة والباقي تاخد بيه تمويل عقاري ( قرض منازل) وتسدده على المدة اللى تريحك.
 

لو عايز تعرف أكتر عن التمويل العقاري ممكن تدخل هنا، اخر اخبار مبادرة التمويل العقاري أبريل 2021

3-   استثمر في التأمين!

التأمين على الحياة والادخار نوع من أنواع التأمين على الحياة، وبيساعدك تستثمر على المدى البعيد، وبتدفع قسط شهري أو سنوي لشركة التأمين، وبيكون مكتوب في بوليصة التأمين عدد سنين معين لحد 60 سنة مثلا، لو كملت السن ده بتاخد مبلغ الاستثمار( الفلوس اللي دفعتها و ارباحها) اللى اتفقت عليه مع الشركة، ولو حصلت الوفاة قبله الورثة أو الأشخاص اللى كاتبهم في البوليصة هما اللى بياخدوا مبلغ التأمين.

ومبلغ اللي بتأخد يعتبر معاش إضافي جنب معاش التأمين الإجتماعي اللي الشغل بيكون مأمنه عليك!

اعرف أكتر عن أنواع التأمين في مصر من هنا، إيه هي أشهر أنواع التأمينات في مصر؟
 

4- استثمر في الدهب!

صعب تستثمر فلوسك في حاجه وتبقى عارف ومطمن 100% انها هترجعلك أضعاف، بس الاستثمار في الدهب مختلف ومربح جدا، لانك بتشوف الوقت المناسب اللى تشتري فيه لما سعره يقل، وبتبيعه لو احتاجت لما السعر يزيد، وده فيه نسبة أمان كبيرة ليك ومش بضطر تبيعه في أي وقت وتخسر فيه مثلا، وفي نفس الوقت معاك سيولة لو اتزنقت في أي وقت ومحتاج كاش تقدر تبيعه.