5 أعراض لمتلازمة ما بعد كورونا
تاريخ النشر: 14 فبراير 2022 طرائف وعجائب
الناس بعد ما بيجيلها كورونا وتخف منها بيجيلها أعراض لأمراض تانية
تعرف ايه عن أعراض متلازمة ما بعد كورونا؟ كنت إيجابي وبعد كدا بقيت سلبي والأشعة والتحاليل بتاعتك بقت أفضل بس لسه في أعراض بتجيلك؟ تعمل ايه بالظبط دا اللي قالته وزارة الصحة والسكان المصرية.
ايه هي أعراض متلازمة ما بعد كورونا؟
- التكسير في الجسم.
- تليف في أنسجة الرئة.
- الوخم.
- الاكتئاب.
- التعب.
يُرجى استشارة الطبيب قبل أخذ الأدوية
أعراض متلازمة ما بعد كورونا
الناس بعد ما بيجيلها كورونا وتخف منها بيجيلها أعراض لأمراض تانية، وزارة الصحة والسكان المصرية أكدت إن المريض بعد ما كان إيجابي وبقى سلبي والتحاليل بقت كويسة والأشعة بدأت تتحسن لو كان فيها بعض الآثار الجانبية ممكن جدًا الفيروس يكون راح من جسمه لكن أثر الفيروس نفسه لسه موجود.
ممكن يكون جتلك كورونا ووقفت كل الأدوية لكن الأعراض بتفضل لسه موجودة، وممكن يحصل مشكلة في ضربات القلب والتهابات في عضلة القلب، وتليف نسيج الرئة، ودي من أعراض ما بعد كورونا.
موسعات للشعب الهوائية
الأغلب الشخص في الحالة دي بيحتاج ياخد موسعات للشعب الهوائية، ومحتاج ياخد كورتيزون ومضادات التليف لمدة 3 شهور لكن طبعًا مهم المتابعة مع الطبيب المختص.
نتيجة العلاجات دي في حوالي 80% بيستجيبوا والأعراض بتروح، وفي 20% بيفضل التليف موجود وبيبقى تليف مزمن وبيحتاج غالبًا أكسجين في المنزل.
بمناسبة كلامنا عن كورونا قولنا: وفرت قد إيه من الشغل فى البيت فى زمن الكورونا؟
هل كل اللي بيجيلوا كورونا بيُصاب بمتلازمة ما بعد كورونا؟
وزارة الصحة والسكان المصرية قالت "لا" مش بالضرورة خاصة لو اللي جتله كورونا كانت خفيفة مش متوسطة أو شديدة.
وفي 85% من المصابين بكورونا بأعراض بسيطة وبيخفوا مابيبقاش عندهم أي أعراض جانبية لكن الناس اللي بيجيلها الكورونا المتوسطة الشديدية هما اللي ممكن يبقى عندم متلازمة ما بعد كورونا خصوصا لو الناس دول مرضى بأمراض مزمنة زي:
سكر وضغط وقلب وزيادة الوزن ومشاكل في الجهاز التنفسي، وبيكونوا عُرضة أكتر للإصابة بتليفات في الرئة.
تعرف ايه عن المتحور الجديد أوميكرون؟ اعرف أكتر من هنا: اليوم العالمي للتأهب للأوبئة وظهور المتحور الجديد أوميكرون!
الوقاية خير من العلاج
لو كان عندك عوامل الخطورة لازم تاخد التطعيم وبعد 6 شهور تاخد الجرعة التالتة المعززة "التنشيطية".
لو بدأ يكون عندك أعراض أنفلونزا أو شبيهة بالأنفلونزا ابدأ علطول العلاج بدري على قد ما تقدر، زي البروتوكول ومضادات الفيروسات، ولازم ترجع للدكتور تتابع معاه الأعراض.
تقدر تشوف الفيديو دا من وزارة الصحة والسكان المصرية عن أعراض متلازمة ما بعد كورونا من هنا
تفتكر كورونا أثر ازاي على العائلات؟! اعرف أكتر من هنا: أثر فيروس كورونا على العائلات
