5 حاجات هتوفرها وأنت متجوز vs وأنت خاطب
تاريخ النشر: 02 فبراير 2022 طرائف وعجائب
بعد الجواز هيكون قلبها عليك وعلى كل جنيه بتدفعه والبدايل الأوفر هتكون أفضل
عيد الحب قرب خلاص الفلانتين valentine's day سواء متجوز أو خاطب لازم تعرف إن الجواز لمصلحتك بالنسبة للمصاريف وهنقولك على 5 حاجات هتوفرها وأنت متجوز مقارنة لو لسه خاطب أو مصاحب أو بتفكر تخلع!
بس لو لسه سينجل ومش بتفكر ترتبط يا بختك يا عم المرتبطين بيحسدوك اعرف أكتر من هنا: 15 حاجة هتوفرها وأنت سينجل ومتنساش الارتباط إحباط!
1- الخروجات
وأنت متجوز الخروجات بتكون أقل بكتير من وأنت خاطب أو مصاحب أو مرتبط لأن ببساطة وأنت متجوز كل فلوس بتدفع بتكون بحساب علشان ميزانية البيت ماتبوظش، وشريكة حياتك مع الوقت بتكون متفهمة دا كويس.
بس برضو ماتنساش هدية الفلانتين علشان مايتنكدش عليك في الحالتين، وكلام من نوعية أنت مابقتش تحبني زي زمان.. خليك في الأمان، اعرف أكتر ايه هي أفضل 10 أفكار موفرة لهدايا الفلانتن
2- هتعرف تتحكم في مرتبك
وأنت متجوز هتبقى فاتح بيت وعندك التزامات كتير فكل حاجة هتبقى بالعقل، طبعًا الدلع والحنية مطلوبين والخروجات بس خلي بالك وأنت متجوز هيبقى كل حاجة محكومة بالورقة والقلم شوية غير وأنت خاطب أو مصاحب.
شريكة حياتك بعد ما تتجوزوا هتبقى فاهمة كل حاجة وقلبها عليك غير وأنت خاطب
3- هتستحمل كل حاجة
شريكة حياتك بعد ما تتجوزوا هتبقى فاهمة كل حاجة وقلبها عليك غير وأنت خاطب لأن زي ما بنقولك ميزانية البيت هي اللي هتبقى رقم 1، وعادي ممكن تخرجوا وتتفسحوا وتنبسطوا بس هتلاقي المصاريف أقل بكتير.
وكدا كدا خلاص المصلحة بقت واحدة وأخيرًا روحت كلمت بابها واتقدمت بشكل رسمي واتجوزتوا فتقدروا تقعدوا مع بعض تتناقشوا وتظبطوا الميزانية سوا.
وبمناسبة كلامنا عن الميزانية لو عاوز تعرف تحوش قد ايه من هنا: حاسبة الميزانية الشهرية اونلاين
4- فلوس المواصلات
بعد الجواز هيكون قلبها عليك وعلى كل جنيه بتدفعه فبالتالي لو في إمكانية تركبوا مواصلات عامة زي ميكروباص أو أتوبيس نقل عام مش هيكون في مانع ولا مضايقة بدل التاكسي أو أوبر.
وخلاص مش هتوصلها لبيتها كل مرة وخاصة لو هي كانت ساكنة بعيد عنك في بيت أهلها لأن خلاص بيتكم واحد والمصلحة واحدة، وممكن تعرف أكتر عن الحكمة في التعامل مع الفلوس من هنا: ازاي تتعامل مع الفلوس بحكمة وانت بتصرفها!
5- باقة الموبايل
أيام ما كنت خاطب فاكر كنت بتصرف قد ايه على باقة الموبايل والكلام بالساعات ولو نمت وسبتها ممكن تبقى زعلة ونكد لأسبوع قدام لكن وأنت متجوز الموضوع هيبقى مختلف هتعرف تركز في الشغل كويس وبعدين لما تروح البيت بالسلامة اقعدوا اتكلموا مع بعض يا سيدي.
ولو لسه سينجل ومش عارف ترتبط اعرف أكتر تعمل ايه من هنا: سينجل ومش عارف ترتبط؟ 6 حاجات ممكن تكون السبب
