أشتري ايه مكملات غذائية للجيم والرياضة؟

بدأت تروح الجيم خلاص أو بتلعب رياضة بصفة مستمرة؟ حلو جدًا ايه الخطوة اللي بعد كدا إنك تحاول تظبط أكلك كويس وتاخد كل العناصر الغذائية اللي محتاجها جسمك يوميًا لكن هل بتقدر تاخد كل احتياجاتك من الأكل.

هنا بيجي الكلام عن المكملات الغذائية supplement وايه اللي أنت محتاجه فعلًا قبل ما تحط فلوسك في أي حاجة وخلاص.. هنقولك على شوية نصايح هتساعدك في اختيار المكمل المناسب ليك وماترميش فلوسك في الأرض لأن الحاجات دي فعلًا قيمتها كبيرة.

بمناسبة كلامنا عن الأكل الصحي اعرف أكتر من هنا: عارف محمد صلاح The Egyptian King بياكل بكام في اليوم!

دور المكملات الغذائية في الفورمة

من اسمها مكملات بتكمل أكلك واحتياجك اليومي من العناصر اللي محتاجها زي الفيتامينات والبروتين وغيرها من العناصر فلو مثلًا بتعمل دايت قاسي فأنت محتاج multivitamin أما لو بتعمل دايت نباتي فأنت محتاج b12 لأنه متواجد أكتر في المنتجات الحيوانية والألبان وأنت مش بتاخد احتياجك منه في نظامك وأنت بتاكل.

كمان لو نظام حياتك مابتتعرضش فيه للشمس فأنت محتاج فيتامين D علشان كدا نظام الدايت بتاعك بيفرق جدا في المكملات اللي بتاخدها مش أي حاجة وخلاص.

سواء بتلعب رياضة أو لا فأنت محتاج الأوميجا 3

الأوميجا 3 

سواء بتتمرن أو لا فأنت محتاج الأوميجا 3 علشان تاخد احتياجك اليومي منه، ومن أهم فوايده للجسم: 

بيقلل خطر الإصابة بأمراض القلب، وبيقلل الدهون الثلاثة، وبيقلل ضغط الدم والكوليسترول وكمان بيقلل الالتهابات وبيحسن صحة المفاصل والعضم وبيحميك من الإصابة بمرض الزهايمر ومفيد للحوامل كمان علشان صحة الأطفال.

لو حابب تلعب رياضة بصفة مستمرة فـ العجلة أفضل حاجة ليك اعرف أكتر من هنا: ازاي تختار عجلة مناسبة ليك من ناحية المقاس والنوع!

مكملات الـ pre workout

ودي بتديك طاقة ونشاط علشان مجهودك يعلى وأنت بتمارس رياضة لكن خلي بالك لو أنت مريض قلب أو عندك مشكلة في الضغط العالي يُفضل ترجع للدكتور أو الكوتش اللي بيدربك تعرف منه لو دا مناسب ليك ولا لا وايه الجرعة المناسبة.

أهم المكونات اللي موجودة في البري ورك أوت اللي لازم تبص عليها كويس وأنت بتشتري "الكرياتين – بيتا ألانين – الأرجنين – الكافيين" ولو بتاخد pre workout ماتشربش قهوة كتير.

Whey protein

نيجي بقى لواحد من أهم المكملات الغذائية الواي بروتين دا تحط فيه فلوسك وأنت مستريح علشان تكمل بيه احتياجك اليومي من البروتين، وممكن تدخله على فكرة في وصفات كتير زي البيتزا والبان كيك وبيبقى طعمه حلو خصوصًا إن في منه بأطعمة.

ماتنساش دايمًا إن في حاجات كتير ممكن تعوضها بالأكل وخليك فاكر إن المكمل بيكمل أكلك الطبيعي يعني مش بديل للأكل.

تابعنا على بلوج فايدتي الفترة الجاية هنقولك على معلومات أكتر عن أفضل الأماكن اللي تشتري منها مكملات غذائية مضمونة ومقارنات كتير مهمة ليك

وماتنساش إنه طبعًا المكملات الغذائية بحر كبير جدًا المهم تعرف أنت بتاخد ايه وليه وهل مفيد فعلًا ولا لا؟