10 ابلكيشن محتاج تنزلهم على موبايلك غير السوشيال ميديا

موبايلاتنا مليانة applications  كتيرة، أغلبها لمواقع التواصل الإجتماعي/ Social Media، بس في تطبيقات تانية محتاج تحتفظ بيها دايما علي موبايلك، هنقولك على 10 منهم هيوفروا لك كتير في معاملاتك اليومية.

1- الـ E-Wallet

هي ابلكيشن تبع البنوك، ممكن يتربط بحساب بنكي، وممكن لأ، بيستخدم فى عمليات الدفع وتسديد الفواتير وتحويل الفلوس من عميل لعميل، وبيعتبر نوع من الحسابات المدفوعة مقدما، لأنه بيتشحن بالفلوس. في حوالي 17 بنك في مصر بيقدموا الخدمة دي.

 اعرف أكتر عن الخدمة دي من هنا، يعني إيه E-wallet/ محفظة الإلكترونية؟

2- شركات الاتصالات

مصر فيها 4 شركات اتصالات، كل واحدة منهم عاملة أبلكيشن لعملائها عشان يتحكموا في خطوطهم من غير ما يضطروا يروحوا لمراكز العملاء أو حتى يتصلوا بيهم. الأبلكيشن هي:

• Ana Vodafone
• My Etisalat
• My Orange
• My We

وعلي فكرة تقدر تقارن ما بين الأربع شركات وتعرف أحسن باقة بالنسبة لك من هنا، قارن وقرر، باقة الـ 100 من فودافون، واتصالات، وارنج وWe!
 

3- تحويل الفلوس

تحويل الفلوس من خلال الموبايل كمان محتاج ابلكيشن، من أشهر أنواع الشركات اللي بتقدم الخدمة دي هي شركة فوري MyFawry، ده غير شركات الاتصالات الـ4، زي اتصالات كاش وأورنج كاش، أما بالنسبة لـ فودافون كاش وWe  فتقدروا تلاقوا الخدمة على الأبلكيشن الأساسية بتاعتهم.
 

4-ابلكيشن الاجتماعات

مع التباعد الإجتماعي اللي فرضه فيروس كورونا، ابتدينا نلجأ لنوعية من الابلكيشن المنسية اللي بتتيح عمل الاجتماعات أونلاين زي ZOOM و Google Meet، ولسه الابلكيشن دي مهمة حتى بعد متابعة الأغلبية للشغل من المكاتب لأن محدش عارف امتي هتحتاج تعمل اجتماع مفاجئ.
 

5- تاكسي بالتليفون

التاكسي كمان بقي أونلاين، ومحتاج دايما تكون جاهز على الأقل بواحد من الاتنين، أوبر أو كريم، وتتابع الـ offers عليهم عشان توفر.

قارن ما بينهم واعرف الأنسب لك من هنا، مين يكسب؟ اوبر ولا كريم؟
 

6- مكانك في الأتوبيس

وكمان حجز الاتوبيسات محتاج تطبيق خصوصا لو بتروح مشاوير بعيدة كتير، وممكن تختار ما بين سويفل وأوبر باص.

قارن ما بينهم واعرف الأنسب لك من هنا، قارن وقرر، هتركب إيه أوبر باص ولا سويفل ولا الميكروباص؟

7- دليفري المطاعم

النوعية دي من التطبيقات بتوفر عليك الوقت والمجهود في التدوير على المنيو وارقام الدليفري لكل المطاعم والمحلات اللي بتبعت لمنطقتك، ده غير أنهم بيدولك Offers. أشهرهم طبعا ElMenus  و Talabat.

قارن بين الاتنين واعرف أحسن offer  ليك من هنا، قارن وقرر مين يكسب؟ المنيوز ولا طلبات؟

8- سكانر

مع هجوم فيروس كورونا في خدمات كتير اتحولت للأونلاين بدل من استخدام الورق عشان التباعد الإجتماعي، زي مطاعم كتير وقفت المنيو في محلاتها وبدلوه بالـ Qr code، عشان كده هتحتاج Qr Scanner علي موبايلك لو الكاميرا مش بتشوفه طبيعي.

9- أكسب من الهواية

لو كنت من مجانين التصوير بالموبايل، ممكن تكسب من بيع الصور دي عن طريق بعض الابلكيشن اللي بتعرض صورك وتتوسط لك مع الشاري. من أشهرها ShutterStock و Twenty20.

10- الشوبينج الأونلاين

مين لسه مجربش الـ Shopping الأونلاين ولا متابع مواقع وبراندات محددة! لو نزلت التطبيقات الخاصة بالمواقع دي هتسهل علي نفسك كتير وهيوصلك أجدد العروض في وقتها. من أشهرهم سوق.كوم جوميا، دي غير البراندات زي Zara وH&M، وIkea لمستلزمات البيت.