8 حاجات فكر تعملها وأنت سينجل في الفلانتين

في اليوم العالمي للحب Valentine's Day 14 فبراير لو أنت أو أنتي سينجل بلاش ندخل في مود الحزن والكآبة والوحدة لأن أكيد في ناس كتير حوالينا بتحبنا وكمان في حاجات كتير ممكن تعملها في اليوم دا وأنت سينجل.

مبدئيًا كدا هتنزل الشارع هتلاقي اللون الأحمر كتير هتفتح فيسبوك هتلاقي بوستات كتير عن الحب، والمحلات بقى أحمر في أحمر وهدايا ودباديب.. هنقولك تعمل ايه في اليوم دا.

لو أنت مرتبط وعاوز تجيب هدية في الفلانتين اعرف أكتر من هنا: 10 افكار موفرة لهدايا الفلانتين

1-   فكك من الحركة دي

مش لطيف إنك تكتب على فيسبوك أنا سينجل وأفتخر والكلام دا لأن مش هتنول غير تريقة ووجع دماغ وخلاص مابقتش روشنة احنا في 2022.

2-   التجاهل في الحالة دي

لما تلاقي حد جاي يروش عليك وهو بيحب مثلًا وبيقولك ايه رأيك في الهدية دي عارف تعمل ايه؟ تجاهله خليك بارد علشان لو عاوز يستفزك حسسه إنه ايه يعني عادي.

3-   ابعد عن اللون الأحمر

لو اليوم دا أنت نازل الشارع رايح الجامعة أو الشغل أو عندك مشواير بتخلصها فأكيد هتقابل ناس كتير لابسة أحمر وفي ايديها هدايا يُفضل ماتركزش مع حد وتسيب الناس في حالها لا تضايق ولا تضايق أصلًا عادي.

4-   كلم اللي بتحبهم

خليك فاكر إن عيد الحب مش مقتصر بس على ولد وبنت لا خالص أنت ممكن تكلم كل الناس اللي بتحبهم تقولهم كلام حلو هيفرحوا جدًا وهيشاركوك محبتك ولطفك.

5-   اخرج مع صحابك السناجل

بس يُفضل يكونوا لطاف علشان لو خارجين يسخفوا على الناس اللي لابة أحمر وجايبة هدايا لبعض هيكون الموضوع مش لطيف خالص، اخرج انبسط أو العب بلايستيشن أو حتى لو هتقعد على الكافيه تهزر وتضحك وتعدي يومك.

يا بختك يا عم وأنت سينجل في حاجات المرتبطين بيحسدوك عليها اعرف أكتر من هنا:15 حاجة هتوفرها وأنت سينجل ومتناش الارتباط إحباط!

6-   هتموت وترتبط؟!

طيب خليك صريح مع نفسك بلاش جو كل أما تقابل حد تكلمه عن عظمة السنجلة وإنها جنتلة وجمدان وأنت أصلًا من جواك هتموت وترتبط، اعرف أنت عاوز ايه كويس.

7-   سيبك من جو الأفلام الرومانسية

بلاش في الفالنتين تتفرج على الأفلام الرومانسية  اللي مش مناسبة ليك ممكن تتفرج على أفلام المغامرات أو الرعب أو أي نوعية تانية خالص، وبلاش تفتح التليفزيون اليوم دا تحديدًا.

8-   دلع نفسك بنفسك

بتحب نفسك؟ حلو جدًا وفي ناس كتير حواليك بتحبك خليك فرفوش وحلو وبلاش جو أحزان تامر عاشور في اليوم دا خليك لطيف وبسيط واتمنى الخير للكل وإن حبهم لبعض يستمر.

لو حد من حبايبك عيد ميلاده قرب اعرف أكتر: 10 هدايا مش مكلفة في موسم أعياد الميلاد ورأس السنة!